حقيقي شابوه يوسف الشريف مسلسل عالمي و كادرات مختلفة .. بس بس المسلسل مسروق من bird box ومن اعمال تانية كمان مفيش اي إبداع .. لا لا بس انا من رأيي ان دة اقتباس وعادي حد ياخد فكرة ويطورها بطريقته.
كل سنة السوشيال ميديا بتتقلب على يوسف الشريف وهل يستحق الشابوه ولا نديه لحد تاني .. مبدأيا كدة مسلسل كوفيد 25 اتعرض من نص رمضان و هيكون عدد حلقاته 15 حلقة ودة في حد ذاته خرجهم من فخ المط والتطويل وخلى جرعة التمثيل والأحداث مركزة وممتعة في كل دقيقة من الحلقة , سواء كان فكرة مقتبسة من عمل تاني او لا فإنجي علاء ليها أسلوبها المختلف في تناول أي فكرة و طبعا إخراج أحمد نادر جلال ذو الطابع المتميز وطبعا عشان انا المفروض ناقدة محنكة فهقولك ان كادراته عالمية ويوسف الشريف غول تمثيل والي بيتأثر نفسيا بالمسلسلات ميتفرجش عشان انا عيني بتوجعني بجد بعد الحلقة ودة بجد مش تحنيك !!
خدنا جرعات نكد محترمة في المسلسلات الكام حلقة الي فاتوا سواء خلي بالك من زيزي أو ملوك الجدعنة أو حرب أهلية بمناسبة حرب أهلية تقريبا يسرا بتحب تخلينا نتعلق بولادها وبعدين يموتوا دة مبقاش اسلوب مسلسلات جدعة والله ..
بس انا جاية اقولكم على أجمد مسلسل كوميدي السنة دي للي حابب يضحك بجد ويخرج من مود الكأبة دة .. أكيد نسل الأغراب المسلسل دة متشابك ومعقد وكل شخصية وكل الأحداث دي مبتفشلش انها تضحكني كل حلقة اكتر من الي قبلها , ولو هتكلم كلمتين جد عن المسلسل هي إن يمكن محمد سامي غلط انه يعمل عمل زي دة.
بمناسبة المسلسلات الكوميدي انصحكم تشوفوا مسلسل النمر لمحمد إمام وهنا الزاهد مسلسل كوميدي لطيف على جنب لوحده كدة مش عامل قلق عالسوشيال ميديا ودة في حد ذاته اختلاف.
و مع اقتراب نهاية موسم المسلسلات حابة اقول كام كلمة في حق السوشيال ميديا بالرغم انها بتحرق عليا أحداث كتير لو فتحتها قبل ما أشوف الحلقة بس توعية الناس بالجانب النفسي و الاجتماعي المقصود من كل عمل وتوجيه المعلومات دي وتقديمها للناس بشكل تفاعلي من خلال المسلسلات أعتقد انه هيكون ليه فوايد اجتماعية كتير جدا ووعي برسايل الأعمال الي المفروض بتأثر على شخصياتنا , مع فهمنا لكل دة هنكون قادرين نختار هنشوف ايه هنختار المناسب لمستوانا الفكري و الي هيعود علينا بفايدة مش مجرد ساعة من وقتنا ضايعة في أي حاجة.
