بعد مشاهدتي لمسلسلات رمضان لهذا الموسم شعرت بالتوتر والعصبية وكدت أن أحطم زجاج مرآتي ..
على غرار بعد تناولي هذا المشروب خسرت ثلاثة كيلوات من أردافي !!
ولكن دة كان شعوري الحقيقي و انا بتفرج بعد كام حلقة من مسلسلات السنة دي ، الموضوع دة بدأ بعد ما شوفت أول حلقة من مسلسل “خلي بالك من زيزي” لأمينة خليل ومحمد ممدوح الي بيقدم شخصية زينب أو زيزي الي عندها نوع من أنواع المرض النفسي وهو عدم التحكم في الانفعالات والتوتر والغضب السريع ، الي يشوف أول حلقة هيتوقع إن زيزي شخصية عصبية أو زي ماقالوا ” الي قادرة عالتحدي وكدة ” ولكن في الواقع زيزي عندها مشكلة وأحداث المسلسل بتخليها تحارب نفسها عشان تحل مشكلتها النفسية الي هي سبب في كل مشاكل حياتها ، من وجهة نظري فكرة المسلسل أعمق من الواضح و تقدم شخصية زيزي في أول عشر حلقات مبشر بحلقات قوية جاية
والموضوع زاد اوي بعد ما شوفت مسلسل لعبة نيوتن و شخصية “هنا” منى زكي القلوقة و المتوترة طول الحلقات والظروف الي بتتحط فيها اللي بتخلي أي حد بيتفرج هيتوتر ويقلق عليها أصلا!
بس العامل المشترك بين المسلسلين هو محمد ممدوح اللي طلع عينه مع منى زكي و أمينة خليل ومستحمل من أول رمضان كمية زعيق وتوتر ومواقف مفاجئة و في المسلسلين يطلعلوا محمد فراج مرة مخرج مجنون ومرة راجل بيحب مراته ، كل دة كوم و سيد رجب كوم ، انا مشفقة عليه والله وبتمنى رمضان يخلص و ممدوح بصحته كدة
حابة أقول في الأخر كدة ان الكلام اللي فات دة ما هو الا رأي شخصي يغلب عليه الطابع الحيادي مع الحب الشديد لشخصيات ممدوح وفراج في أي عمل بيتواجدوا فيه و رغم اني اتوترت لتوترهم وانا بتفرج بس هكمل المسلسلين للآخر و متحمسة ليهم جدا وشايفاهم من أحسن أعمال السنة دي.
